濕度極高5個民間快速乾衣方法

呢幾日天文台錄得相對濕度介乎85%至100%，唔少人都係家中開抽濕機吸濕吸足一日；電器舖抽濕機通通被搶購一空，好多人連display機都唔放過，最緊要有得即買即用。濕度高，搞到啲衫洗完就乾唔到，濕笠笠；不過無理由次次拎啲衫去洗衣鋪洗卦？以下五個民間快速乾衣方法，希望幫到大家：

l  H形掛衫法──好多人以為『V』字形嘅排衫方法最易易乾就錯啦！將衣物『H』形咁排，中部留下嘅空間有利上升氣流帶走水分，配冷氣、風扇或者抽濕機，加快室內空氣對流能加快晾乾速度。如果『H』排法需要四小時先乾，『V』字同亂排法都需要四個半小時。

l  風筒吹袋中物──將細件的衣物放入膠袋，再將風筒風口塞入袋口握緊。風筒吹出嘅熱風，係袋入面循環，加快吹乾速度。但呢個明顯係臨時無襪用嘅急救法，而風筒風吹一陣要停一停，免得袋內過熱。

l  一長一短──掛毛巾要一長一短，增加接觸空氣機會，令更快水分揮發。

l  咖啡渣、茶葉放衣櫃──咖啡渣、茶葉渣同石灰粉都係有效嘅吸濕材料，分別將佢地渣放入舊絲襪或紗布袋，再放進衣櫃，即可起吸濕除臭雙重效果。

l  蠟燭蒸水汽──係室內點燃蠟燭，10分鐘後可令四周嘅水汽蒸發，但係室內點蠟燭要小心避開衣物、紙張等易燃物品。