落雨濕身濕腳速乾5式

今早突如其來嘅紅雨，相信早已殺唔少上班族及學生哥一個措手不及，而且個天近來睇怕都唔係好鍾意大家，事關天文台預測所見係連落9日雨！既然雨季殺到嚟，當然帶遮出街防濕身已是常識吧，只係有時大雨起上嚟，真係有遮都唔掂，唔想被雨滴濕身咁唔舒服？即學以下落雨濕身濕腳速乾5式：

l   冷氣極速乾衣
返到 office、 學校，總有一部冷氣機喺左近。反正冷氣已開，唔爭在將濕咗嘅衫掛喺冷氣機底吹乾。如果件衫唔太濕嘅話，一頭半個鐘都夠吹乾。

l   著速乾衫褲及內衣
落雨濕身濕腳，肯定唔會舒服得去邊，呢個時間就係速乾衣物大派用場嘅時候！除咗Nike、Uniqlo等大型品牌有自家速乾衣物系列外，就連 Patagonia、MontBell 等專業戶外品牌都有速乾內衣畀大家打好個底，時刻保持乾爽。

l   用定防水wax、水鞋遮風擋雨
落雨濕腳其實比濕身更慘！各位西裝友不妨用定防水wax，令皮鞋、雙腳冇咁易整濕，女士的話，更可著上水鞋遮風擋雨，順便show長腿！

l   報紙攝鞋吸濕
真係連鞋櫳都濕埋嘅話，好多人都會選擇用風筒直接吹乾，不過如果喺office、學校，未必有風筒嘅情況下又可以點做？不妨用報紙攝鞋吸濕，仲可以去除鞋內異味，一舉兩得。

l   紙袋 + 風筒 = 小型乾衣機
最有效速乾辦法，莫過於用紙袋及風筒，自製小型乾衣機，將袋口盡量縮小至跟風筒吹風口直徑一致，然後將熱等向內吹即可，適合整乾T-shirt、襪等較細件嘅衣物。